Alfreð Birgisson var valinn Trissubogamaður BFSÍ árið 2023. Þetta er annað árið í röð sem Alfreð hreppir titilinn. Valið fer fram á hlutlausann veg byggt á útreikningi árangurs keppenda á árinu á innlendum og erlendum mótum.
Alfreð vann fyrstu formlegu Íslandsbikarmótaröð innandyra á vegum Bogfimisambands Íslands og hreppti því 50.000.kr verðlaunaféð. Bikarmótaröðin er kynlaus og því hörð samkeppni í henni. Sigurvegari er titlaður byggt á bestu þremur skorum keppenda úr Bikarmótum BFSÍ 2022-2023. Alfreð tók sigurinn með 1712 stig og var því titlaður fyrsti Íslandsbikarmeistari BFSÍ í trissuboga.
Alfreð vann báða Íslandsmeistaratitla trissuboga karla árið 2022. Árið 2023 vann Alfreð sig aftur upp í gull úrslitaleiki á Íslandsmeistaramóti utandyra og innandyra, en á báðum mótum voru gull úrslitaleikirnir hnífjafnir. Alfreð náði að verja Íslandsmeistaratitil sinn utandyra 136-135 en þurfti að sætta sig við silfrið innandyra í leik sem endaði 143-142. Það kom þó ekki að sök þar sem heildarframmistaða Alfreðs var nægileg til að tryggja honum Trissubogamaður árins 2023 annað árið í röð.
Alfreð var skráður til keppni á Evrópumeistaramóti innandyra í febrúar 2023 í Samsun Tyrklandi en hann lenti í 8 sæti með liðinu á EM 2022. En því miður var EM aflýst þegar þjóðarsorg var lýst yfir í Tyrklandi vegna náttúruhamfara sem gengu yfir landið nokkrum dögum fyrir EM. Jarðskjálftahrina reið yfir landið, þar sem fleiri en 50.000 manns fórust og öllum viðburðum því aflýst í landinu.
Alfreð keppti á HM utandyra í Berlín þar sem hann endaði í 39 sæti ásamt liði sínu. Alfreð stóð sig vel í opnu heimsmótaröð alþjóðabogfimisambandsins innandyra þar sem hann endaði í 40 sæti á World Series Open heimslista. Alfreð endaði einnig í 9 sæti ásamt liði sínu á Evrópubikarmóti utandyra í apríl í Bretlandi.
Alfreð var að ljúka keppni á JVD Open í Hollandi og World Series í Lúxemborg og er 26 sæti á World Series Elite heimslista þegar þetta er skrifað. En heimsmótaröðin 2023-2024 endar í janúar 2024 og þá verða loka úrslit ljós.
https://bogfimi.smugmug.com/HM-%C3%BAti-Berl%C3%ADn-2023/i-gf8gJzD/A
Alfreð er skráður til keppni á EM innandyra í Króatíu í febrúar 2024 og er áætlaður til keppni á EM utandyra í Þýskalandi í maí. Mögulegt er að hann taki þátt í fleiri landsliðsverkefnum ef tækifæri gefst til, en sem slökkviliðsmaður, ökukennari, þjálfari, fjölskyldumaður, einn af megin stoðum bogfimi á Akureyri og alt muglig mand, þá eru bara ákveðið margir dagar í hverju ári sem er mögulegt að eyða í æfingar og keppni 😉
Hér fyrir neðan er hægt að finna nokkrar fleiri fréttir um árangur Alfreðs á árinu.
Formlega lýkur tímabili fyrir mót sem notuð eru til tölfræðilegs útreiknings 30 nóvember, en þar sem að síðasta mót sem gæti haft áhrif á tölfræðilega valið lauk 19 nóvember var ákveðið að birta lokaniðurstöðurnar tölfræðinnar eins fljótt og mögulegt var.