Þorsteinn varð í 31. og neðsta sæti þegar keppendur skutu um uppröðun á laugardaginn. Hann þurfti því að mæta stigahæsta manninum í fyrstu umferð sem reyndist vera Bandaríkjamaðurinn Kevin Polish.

Þorsteinn stóð sig þó með mikilli prýði í þessari fyrstu útsláttarumferð. Keppendur fá 15 örvar til að skjóta í skífu, skotið er þremur örvum í einu í fimm umferðum. 10 stig fást fyrir að skjóta í miðjuna, 9 stig í næsta hring og svo koll af kolli.

Sá bandaríski byrjaði betur og náði fljótt forskoti sem Þorsteinn gat ekki unnið upp. Þorsteinn skaut 9-9-6 í fyrstu umferð, 10-7-8 í annarri, 8-8-7 í þriðju og í síðustu tveimur hitti hann best. 10-9-10 í fjórðu og 9-10-9 í fimmtu. Hann fékk 129 stig gegn 143 stigum Bandaríkjamannsins sem fór því áfram í 16 manna úrslit.

Það er skemmst frá því að segja að það gekk allt á afturfótunum hjá Þorsteini. Hann náði aðeins 599 stigum sem er langt undir hans meðaltali og varð hann í 31. og neðsta sæti. Þar sem keppendur eru 31 keppa 30 manns um að komast í 16 manna úrslit og þangað fer beint sá stigahæsti í gær.

Mótherji Þorsteins í fyrstu umferð verður því afar fær atvinnumaður í bogfimi fatlaðra, Bandaríkjamaðurinn Kevin Polish sem varð í 2. sæti með 685 stig. Polish er handalaus og skýtur af boganum með fætinum.

Þorsteinn var afar óhress með frammistöðu sína í viðtali við RÚV og sagðist hreinlega ekki skilja hvað fór úrskeiðis. Allt hafi gengið vel í undirbúningnum en þegar kom að alvörunni þá hafi fátt gengið upp hjá honum. „Ég bara skil þetta ekki en ljósi punkturinn er að ég er að fara að keppa við þann flottasta. En ég er ekki að fara að vinna hann. Ég veit það.“

Þorsteinn tryggði sig inn á Ólympíumótið á dramatískan hátt í sumar eða með síðustu örinni á móti í Tékklandi.