Sveinn Sveinbjörnsson Íslandsmeistari karla og allra

14/04/2025 Guðmundur Fréttir 0

Sveinn Sveinbjörnsson vann fyrsta Íslandsmeistaratitil í langboga/hefðbundnum bogum í íþróttinni á Íslandsmeistaramótinu á sunnudaginn síðastliðinn.

Sveinn hefur tvisvar unnið Íslandsmeistaratitil í einstaklingskeppni og tvisvar í félagsliðakeppni með liði sínu 2023 og 2024 en í öllum tilfellum var það í berboga. En þetta er fyrsti einstaklings Íslandsmeistaratitillinn hans í langboga og fyrsti titill sem BFSÍ veitir í langboga. Sveinn vann einnig silfur í félagsliðakeppni með liðsfélögum sínum í BF Boganum í Kópavogi á ÍM um helgina.

Sveinn er elsti Íslandsmeistari í meistaraflokki í sögu íþróttarinnar með töluverðum mun. En hann varð 80 ára í mars á þessu ári. Sveinn er einnig eini keppandi sem hefur unnið Íslandsmeistaratitil í meistaraflokki eldri en 60 ára.

Af síðustu 70 Íslandsmeistaratitlum í öllum keppnisgreinum í íþróttinni hafa aðeins 8 þeirra titla endaði í höndum keppenda sem voru 50 ára eða eldri. Sveinn tók tvo af þeim, Haraldur tók 5 og Albert tók einn.

Keppni um einstaklings Íslandsmeistaratitil karla:

Sveinn efstur í undankeppni ÍM og sat því hjá í 16 manna úrslitum. Í 8 manna úrslitum vann hann öruggann sigur á Akureyringnum Óliver Þór Wendell og hélt því áfram í undanúrslit.

Í undanúrslitum mættust Sveinn og Daníel Örn Linduson Arnarsson úr Langbogafélaginu Freyju. Þar vann Sveinn nokkuð öruggann sigur 6-2 og náði einni fullkominni lotu 10-10-10, enginn sénsar gefnir og Sveinn hélt áfram í gull úrslitin.

Í gull úrslitaleiknum mættust Sveinn og Haukur Hallsteinsson úr Langbogafélaginu Freyju, sem var í öðru sæti í undankeppni mótsins og er formaður félagsins. Sveinn átti frábærann leik og vann örugglega 6-0 og tók fyrsta formlega Íslandsmeistaratitil karla í langboga/hefðbundnum bogum.

Keppni um einstaklings Íslandsmeistaratitilinn (óháð kyni):

Sveinn var efstur í undankeppni ÍM og sat því hjá í 16 manna úrslitum. Í 8 manna úrslitum vann hann nokkuð öruggann sigur 6-2 gegn Áka Jarl Lárusyni úr LF Freyju og hélt því áfram í undanúrslit.

Í undanúrslitum mættust Sveinn og Ragnar Smári Jónasson liðsfélagi Sveins úr BF Boganum í Kópavogi. Sveinn vann leikinn nokkuð örugglega 6-2, en Ragnar náði að hræða hann með einni næstum fullkominni lotu 29 stig. Sveinn hélt því áfram í gull úrslitaleik ÍM.

Í gull úrslitaleiknum óháð kyni mættust aftur Sveinn og Haukur Hallsteinsson úr Langbogafélaginu Freyju. Haukur var þá kominn í betri gír og skoraði hærra í lotunum, en Sveinn gaf ekkert færi á sér og skaut ekki ör út fyrir gula í nánast öllum úrslitaleiknum og vann örugglega 6-0 og tók því líka fyrsta formlega Íslandsmeistaratitilinn óháð kyni í langboga/hefðbundnum bogum.

Keppni um Íslandsmeistaratitilinn í félagsliðakeppni: 

Í félagsliðakeppni var Sveinn ásamt liðfélögum sínum Astrid og Ragnari í BF Boganum í öðru sæti í undankeppni ÍM. Þau kepptu gegn LF Freyju í gífurlega jöfnum og spennandi gull úrslitaleik Íslandsmeistaramótsins.

BF Boginn tók fyrstu lotu úrslitaleiksins 44-43 og leiddu leikinn 2-0. BF Boginn tók aðra lotuna líka 45-41 og leiddu nú leikinn 4-0 í hálfleik og LF Freyja í þröngri stöðu, þar sem aðeins eru 8 stig í pottinum og eina leið þeirra til sigurs væri að vinna síðustu tvær loturnar til að jafna leikinn og knýja fram bráðabana. Freyjumenn náðu því og skoruðu tvö hæstu skor leiksins í síðustu tveim lotunum 48-41 í lotu 3 og staðan 4-2 og 51-45 í lotu 4 og jöfnuðu leikinn 4-4.

Þar sem leikurinn endaði í jafntefli þá þurfti bráðabana til þess að ákvarða sigurvegarann og Íslandsmeistarann. Bráðabaninn endaði 28-24 fyrir LF Freyju sem tók því sigurinn. Sveinn tók því silfrið ásamt félagsliði sínu BF Boganum.

Samantekt af árangri Sveins á ÍM langboga meistaraflokki:

  • Íslandsmeistari – Langbogi karla – Sveinn Sveinbjörnsson – BFB Kópavogi
  • Íslandsmeistari – Langbogi (óháð kyni) – Sveinn Sveinbjörnsson – BFB Kópavogi
  • Silfur – Langbogi félagsliðakeppni – BF Boginn Kópavogi
    • Sveinn Sveinbjörnsson
    • Astrid Daxböck
    • Ragnar Smári Jónasson

Þetta er í fyrsta sinn sem Íslandsmeistaratitlar eru veittir í langboga/hefðbundnum bogum (almennt kallað langbogaflokkur), en flokknum var bætt við formlega við regluverk BFSÍ síðasta haust. Það hefur þó verið keppni í langboga og öðrum hefðbundnum bogum (t.d. hestabogum) um langt skeið á Íslandi og erlendis. Á fyrstu Ólympíuleikum voru allir keppendur meira og minna með langboga, en margt hefur þróast síðan þá, en ekki í hjörtum allra. Bogfimi var einnig ein fyrsta íþrótt sem leyfði þátttöku kvenna á Ólympíuleikum.

ÍM í berboga og langboga var haldið í Bogfimisetrinu sunnudaginn 13 apríl 2025.

Keppt er um fjóra Íslandsmeistaratitla í hverri íþróttagrein (bogaflokki)

  • Einstaklings karla
  • Einstaklings kvenna
  • Einstaklings (óháð kyni)
  • Félagsliða (óháð kyni)

Mögulegt er að finna frekari upplýsingar hér:

ÍM í berboga/langboga, fyrstu titlar veittir í langboga/hefðbundnum bogum og 75% titla í berboga skiptu um hendur